Dins la lista de las jornadas internacionalas decretadas per las Nacions Unidas, dempuèi 2010 se festeja cada 18 de julhet lo Jorn de Nelson Mandela, a l’escasença de son anniversari. Es aital que l’ÒNU vòl commemorar annalament la libertat, la justícia e la democracia, de valors encarnadas perfièchament pel dirigent sud-african e prèmi Nobel de la patz de 1995. Lo nonanta cinquen anniversari d’ièr, Madiba (“lo paire”, coma es conegut) lo passèt dins un espital ont intrèt fa un mes e mièg per una infeccion palmonica.

Dempuèi 2009, tre lo succès de la celebracion dels nonanta ans de Nelson Mandela que se debanèt a Hyde Park, a Londres, l’an abans, fòrça gents del Mond entièr demandèron que la jornada se commemorèsse internacionalament. L’ÒNU i respondèt en declarant lo 18 de julhet lo Jorn Internacional de Nelson Mandela, que se festegèt per lo primièr còp en 2010. La jornada crida a consagrar simbolicament seissanta sèt minutas de nòstre temps a una bona accion o a un servici comunautari en remembre dels seissanta sèt ans de militància politica e en favor dels dreches de l’umanitat.
 
En Sud-Africa mai que mai, e en general dins tot lo Mond, se debanèron ièr d’activitats de tota mena per rendre omenatge a la figura de Mandela. Çò mai especial foguèt benlèu lo cant d’Happy Birthday dins totas las escòlas sud-africanas a uèch oras picantas del matin. Tanben se debanèron de desenats d’iniciativas de caritat e de benfasença. Lo president sud-african, Jacob Zuma, participèt a fòrça eveniments oficials.
 
Al delà, se faguèt una pojada al som de Kilimanjaro, la montanha mai nauta d’Africa, e lo Torn de França faguèt un remembre especial. Un vintenat de vilas estatsunidencas programèron d’actes, e a Melbourne (Austràlia) se faguèt un grand concèrt de musica africana.
 
Nelson Mandela es espitalizat dins una clinica privada de Pretòria, dempuèi lo 8 de junh passat, per una infeccion palmonica cronica, sequèla dels vint e sèt ans de preson jol regim racista. Mercés a l’assisténcia respiratòria, Madiba se ten dins son estat critic, mas estable, dempuèi lo 27 de junh.